Isolation centers giandam

CEBU, Philippines — Gipangandaman sa siyudad sa Sugbo kining padayong pagsaka sa kaso sa coronavirus (COVID-19) sa siyudad pinaagi sa pag-andam og dugang nga mga isolation facility.

Si Cebu City Councilor Joel Garganera, Deputy Chief Implementer for Inter-Agenct Task Force Emergency Operations Center Cebu City miasoy dunay kapin 400 ka mga beds ang operational karon nga gikan tulo ka Barangay Isolation Centers nga mao ang City Central School, Mabolo ug Zapatera.

Dunay laing lima ka BICs nga dunay 600 ka beds ang giandam ug gipaabot nga buksan kun pananglitan padayon mosaka ang mga kaso.

Ang mga mild to moderate ang sintomas adto dad-on sa Cebu City Quarantine Center sa North Reclamation Area nga sa pagkakaron duna pay bakante nga 90 ka beds.

Gumikan kay wala na ang mga isolation facility kaniadto sa siyudad nga mao ang Bayanihan Center, IEC ug NOAH nakig-alayon karon ang EOC sa usa ka hotel aron himoong isolation center. Padayon nga nanawagan ang konsehal sa katawhan nga magpabakuna gyud ug dili mamili og bakuna sanglit makatabang kini kun pananglitan maigo sa COVID-19 dili mograbe ang epekto kanila sa maong sakit.

Giawhag sab niini ang katawhan nga dili mokompiyansa ug pabilin nga mosunod sa basic health protocols aron malikayan nga maigo sa maong virus. Base sa talaan, 1,133 na ang aktibong kaso sa Covid-19 sa siyudad sumal pa sa Department of Health Central Visayas.

Ang Cebu City naa karoy 26,595 total cases human dunay napuno nga 56 ka bag-ong kaso niadtong Lunes. Samtang 36 ang dugang naayo ug dunay usa nga nadugang sa namatay.

Usa sa bag-ong natakboyan mao si Kapitan Clifford Jude Niñal sa Barangay San Nicolas Proper kinsa nipahibalo niini diha sa iyang Facebook page nga siya positibo sa Covid-19.

Matud pa ni Niñal, wala man unta siyay gipamati gawas sa iyang piang ug sa hubag sa iyang agtang apan positibo naman hinoon siya sa Covid-19.

Apan matud niya bisan napositibo siya dili siya mauwaw kay naglihok man siya sa barangay. —Rowena Capistrano/IBM (BANATNEWS)