CEBU, Philippines — Ang Cebu Provincial Police Office wala pa mopagawas og conclusion sa imbestigasyon nila kabahin sa kamatayon sa magtiayon.
Ang biktima giila nga si Gavino Sanchez, 49, usa ka negosyante ug asawa niining si Arlene, 47, usa ka maestro sa Tubod Elementary School sa Lungsod sa Minglanilla kinsa gikatahong missing niadtong Hunyo 16, 2021.
Si Police Colonel Engelbert Soriano, direktor sa CCPO nagkanayon nga naghuwat pa sila sa resulta sa autopsy ug sa ballistic test ug sa request nila sa Anti-Cybercrime group diin aduna usab sila’y gisumitir nga mga ebidensiya ngadto sa maong ahensiya aron kini masusi.
"As of this time wala pa kaming konkreto na conclusion”, matud ni Soriano.
Matud ni Soriano nga ang mga ebidensiya nga ilang nahipos posibleng maghatag kini og katin-awan sa nahitabo sa wala pa patya ang mga biktima.
Ang magtiayong Sanchez nakaplagan kining patay na niadtong Hunyo 19, 2021 diha sa Barangay Tananas nga bukirang barangay sa Lungsod sa San Fernando sulod sa itom nga pickup truck.
Matud ni Soriano nga lakip sa motibong ilang gilantaw karon kabahin sa robber ug posibleng kalambigitan sa ginadiling drugas.
Sa nilabay’ng tulo ka adlaw si Police Major Eduardo Sanchez igsuon sa mga biktima ang ni-coordinate kini sa CPPO isip parti sa ilang imbestigasyon.
Si Soriano nagkanayon nga base sa nakita diha sa lugar nga nahitaboan posibleng dili usa lang ang mga responsable sa krimen. —BDB (BANATNEWS)