Diskwento, ihatag sa fastfood chains sa mga nabakunahan

CEBU, Philippines — Gitigom sa Cebu City Emergency Operations Center ang mga tagdumala sa nagkadaiyang fastfood chains sa siyudad ug  ilang gituki kun unsang mga inisyatibo ang angay buhaton aron madasig ang mga tawo nga magpabakuna batok Covid-19.

Buot sa EOC nga makatabang kining maong mga fastfood chains pagdasig sa mga tawo pagpabakuna pinaagi sa nagkadaiyang diskwento o pakapin nga ilang ihatag sa mga kustomer nga nabakunahan.

Gihangop sa pangulo sa EOC nga si Konsehal Joel Garganera ang kooperasyon sa mga tagdumala ug mga tagiya sa fastfood chains kay bisan tuod og kini kompetisyon nipatigbabaw ang panaghiusa  ug dedikasyon nila aron matabangan ang nasud.

“It is admirable how these companies, despite the competition, decided to be united to combat the adverse effects of this pandemic. Truly, we can heal if we are one,” matud pa ni Garganera.

Nahisgotan usab sa maong tigom ang padayon nilang pagpatuman sa health protocols sulod sa mga kan-anan isip usa sa pamaagi sa paglikay sa pagkuyanap sa COVID-19.

Sa pikas bahin, giangkon sa mga negosyante sa Dakbayan sa Talisay nga naapektohan gyud sila sa pandemya niadtong miaging tuig apan

hinay-hinay sila karon og bangon samtang nitabang sa kagamhanan sa tinguha nga makuha ang herd immunity.

Si Cyril Velasco, presidente sa Talisay City Chamber of Commerce Trade and Industry nibutyag nga nagkasabot sila nga mohatag og diskwento sa mga kustomer nga fully- vaccinated na batok Covid-19.

“Aside from giving discount sa mga nagpabakuna it is also saying thank you for doing your job to make the city safe,” asoy pa ni Velasco.

Iyang giangkon nga dili kalikayan ang kompetensya apan sa grupo diha ka makadungag sa koneksyon ug saktong suporta.

Ang chamber of commerce pipila na katuig nga wa maglihok hangtud nga giusa ni Velasco aron sila makatapok.— Jason David Bacus /IBM (BANATNEWS)