Duha ka imnanan nga nagpadisko ipaubos sa imbestigasyon

CEBU, Philippines — Ang Inter-Agency Task Force Emergency Operation Center Cebu City mopahigayon og imbestigasyon kabahin sa duha ka imnanan sa uptown area sa Dakbayan sa Sugbo nga giingong nagpadisko ug nagpa-live band niadtong nilabay’ng Sabado ug aron makasulod kinahanglang magpa-book sa online.

Kini ang gibutyag ni Konsehal Joel Garganera, deputy implementer sa EOC. Subling giklaro ni Garganera nga wala pa tugoti ang disko ug gani sa ilang meeting tali sa mga representante sa mga imnanan giawhag nila kini nga kon magpa-sounds kinahanglang dili makaagni sa mga tawo nga mosayaw aron dili magkiat ilabi na kon nakainom.

“Kaning mga bar operators they already know the sanctions, in fact as told by Atty. Jared he was able to send 7 to 9 kabuok nga show cause order over last weekend”, butyag ni Garganera.

Ang Business Permits and Licensing Office (BPLO) nakapagawas og pito ngadto sa siyam ka show cause order diin ang mga establisamento nga gipadad-an ang gipaesplika.

Ug kon nakahimo na kini og duha ka kalapasan masuspenso ang operasyon sa establisamento ug posibleng ma-revoke ang ilang “special permit to serve liquor”.

“Wala’y disco, yes naa diha as EO sa atong mayor nga there are entertainment live, yes pwede, naay mga acoustics, naay mga sounds but then again no live entertainment are allowed without the express approval and permit of BPLO.”, dugang ni Garganera. —BDB (BANATNEWS)