CEBU, Philippines — Sinako nga basura ang nakuha sa mga sakop sa Department of Engineering and Public Works(DEPW) Cebu City sa ilang pag-limpyo sa mga esteros sa siyudad diin nakabara ang maong mga basura nga maoy hinungdan sa pagbaha kagahapon.
Naagian sa Banat News ang mga tawo sa DEPW nga nanglimpyo sa estero sa boundary sa Parian ug Barangay Day-as, diin mano-mano nilang gikuha ang mga basura tungod kay wala’y ekipo nga makasulod gumikan sa kahuot sa lugar.
Si Guillermo Voila sa DEPW miasoy nga ang tubig sa Parian, Day-as ug Sikatuna adto moderetso sa maong estero nga sumpay sa Lahug River maong kinahanglan gyud malimpyohan aron makaderetso ug dili moawas nga moresulta sa pagbaha.
“Kinahanglan ang tawo madisiplina nga dili sila maglabay og basura, sa among tan-aw 80 percent sa cause of flooding is garbage, kung ang tawo kahibawo lang manghinlo, kahibawo lang dili molabay sa ilang basura it means 80 percent sa atong flooding mawala nana siya, gamay nalang unta, ugaling kay naa naman tay ordinansa siguro ang disiplina gyud sa tawo ug enforcement lisod”, ni Viola pa.
Gumikan niini giawhag sa DEPW ang katawhan nga ilabay og sakto ang basura ug dili kini ipasagad og butang aron dili maadto sa mga esteros unya mao na hinoon ang rason sa mga pagbaha.
“Kung ma obserbahan nimo tan-awa ra gud bottled water, mag-inom og bottled water human labay lang, bati gyud”, ni Viola pa.
Si Viola miasoy nga daghan sila og gitrabaho ug usa lang kini sa ilang maintenance work. —MEL (BANATNEWS)