2,578 ka indibidwal ang nabakunahan na sa Naga
CEBU, Philippines — Niabot na ngadto sa 2,578 ka indibidwal sa Siyudad sa Naga ang nabakunahan batok sa COVID-19.
Gikan kini sa mga nagpabakuna sukad niadtong Abril 4 hangtud Mayo 29, 2021.
Base sa post diha sa face book page sa siyudad, 422 ka Nagahanon ubos sa priority group A1 (healthcare workers), A2 (senior citizens), ug A4 (essential workers) ang nakadawat na sa ilang second dose base sa ilang schedule.
Nasayran nga walay natala nga “adverse effects” nga nasinati ang mga nabakunahan diin giingong kasagaran nila walay gipamati sa lawas.
“Ang uban adunay gipamati sama sa pagmaol sa lawas, danggas ug sakit sa bukton diin didto giturok ang injection apan sigon sa atong mga doctor sa City Health Office nga natural kini ug parehas ra kini ug epekto sa ubang bakuna”, tipik sa post sa Naga LGU.
Sayo pa, si Mayor Kristine Vanessa Chiong nagpaturok na kini sa iyang unang dose sa bakuna batok sa COVID-19. BDB (BANATNEWS)
- Latest
