DTI nipahinumdum sa price freeze; Presyo sa utanon nikunhod

CEBU, Philippines — Ang Department of Trade and Industry-7 nipahinumdum sa mga magpapatigayon nga namaligya sa basic necessities sa Central Visayas kalabotan sa price freeze samtang ang nasud ubos pa sa state of calamity tungod sa African Swine Fever.

Matud sa DTI nga ang basic necessities sa mga lugar nga gideklara nga disaster area automatic nga frozen sa ilang presyo o walay pagsaka sa presyo. Ang DTI-7 nipagawas sa mga baligya nga ubos sa price freeze gikan sa mga delata ngadto sa laundry essentials.

Dugang sa DTI nga ang price control magpabilin kini samtang ubos pa sa kalamidad ang sitwasyon.

Ang pangulo sa Cebu City Agriculture Department Joey Baclayon nibutyag nga naghinobra ang supply sa produkto sa utanon sama sa repolyo, lettuce ug  kamatis sa siyudad hinungdan nga niubos ang presyo niini.

Sa nilabay’ng duha ka semana ang presyo sa repolyo niabot og P2 ngadto sa P5 ang kilo ug ang kamatis niabot og P8 ang kilo. Nasayran nga sugod niining tuiga sa wala pa nanghinobra ang supply sa utanon ang matag kilo sa repolyo naa sa P60 ngadto sa P80 kon on site kini paliton.

Hinuon giingong recovering ang mga mag-uuma tungod kay gitabangan sila sa siyudad nga makapangita og merkado nga pwede nila nga baligyaan sa ilang mga produkto sama sa Carbon Public Market.

Base sa price monitoring sa City Agriculture Department ang kilo sa repolyo sa maong merkado naa sa P40 ngadto sa 50 ug matud usab ni Baclayon nga usa sa ilang nakita mao ang pagdala sa produkto gikan sa bukid paingon sa downtown.

Ug gumikan niini, ang siyudad nitanyag og hauling trucks nga magamit sa mga mag-uuma aron matabangan sila sa pagdala sa ilang produkto gikan sa ilang lugar paingon sa mga merkado.

Gibutyag ni Baclayon nga usa sa ilang nakitang solusyon mao ang pagbalik sa “Tugbong Tabo sa City Hall” diin kaduha na sila nihangyo sa Inter-Agency Task Force(IATF) nga ibalik kini apan gibalibaran sila sa kabalaka nga adunay mahitabong tapok-tapok.

Bisan og nabalibaran na, gibalik na usab nila og hangyo ang IATF aron makatabang sa mga mag-uuma ug gipasalig nila nga ipatuman ang minimum health protocols aron malikayan ang pagkatap sa COVID-19. Ang Tugbong Tabo sa City Hall kaniadto ipahigayon kada Miyerkules, Huwebes ug Biyernes.

Base sa registration sa kagamhanan sa siyudad niabot sa kapin 9,000 ka mag-uuma nga gikan sa 28 ka bukirang barangay ang adunay lain-laing giatiman nga gilangkuban sa mga buwak, humayan, utanon, sweet corn ug uban pa.

Ang mga produkto sa mga mag-uuma rehistrado usab kini sa Philippine Crop Insurance Corporation.— Decemay P. Padilla/BDB (BANATNEWS)