Mga prutas ug utanon gipadangat sa kabarangayan

CEBU, Philippines — Gipadangat na sa Cebu City Market Operations Division (MOD) inabagan sa vendors sa Carbon Public Market ang mga prutas ug utanon ngadto sa nagkadaiyang barangay sa Dakbayan sa Sugbo.

Tipik kini sa paghatag nila og katumanan isip suporta sa mga naumol nga community pantry diha sa kabaranggayan.

Sayo pa, gibutyag sa MOD nga nag-tampo-tampo ang vendors Carbon Public Market alang sa pag-umol og community pantry diha sa nagkadaiyang lugar sa Carbon hangtud nga naabot gyud kini sa kabaranggayan.

Ang maong pantry alang kini sa mga tawo nga naglisod tungod sa pandemiya.

Matud sa hepe sa MOD Irvin Cabales nga kasagaran sa itunol sa vendors mao ang sobra nila nga baligya nga utanon, prutas, karne ug uban pa.

Ug kon daghan og stocks o manobra ang idonar nga produkto mao na kini ang ipadangat nila diha sa kabaranggayan.

Kalabot usab sa mga idonar nga karne gipasalig ni Cabales nga mag-agi kini og inspeksiyon aron masiguro ang kalidad niini ug dili makadaot sa panglawas sa tawo.

Gihangop ni Mayor Edgardo Labella ang maong pamaagi diin makita ang pagkamatinabangon sa mga Sugbuanon.

Sayo pa, si Labella nagkanayon nga dili na kinahanglang mokuha og permit ang mga tawo nga mopasiugda sa maong klase nga proyekto. BDB (BANATNEWS)