Tulo ka polis gireklamo’g pagpanglugos

CEBU, Philippines — Tulo ka mga polis sa Lungsod sa San Fernando ang girelibohan human gireklamo sa usa ka babaye og pagpanglugos.

Kini ang gitug-an ni Police Brigadier General Ronnie Montejo, pangulo sa Police Regional Office 7 nga nahinabi sa mga tigbalita.

Matud pa ni Montejo, nitawag sa iyaha si Police Major Alejandro Batobalonos, Chief of the Integrity Monitoring and Enhancement Group Visayas Field Unit (IMEG-VFU) may kalabutan sa maong reklamo.

Dali niyang gimandoan kang Police Col. Engelbert Soriano ang Cebu Provincial Police Office Director sa pagdis-arma sa maong mga polis ug ipaubos dayon sa camp restriction.

Gipalawman pa ang imbestigasyonkay giingong nag-usab usab ang pamahayag sa babaye. Ang maong babaye naa karon gikostudiya sa Women’s Desk.

Sa inisyal nga kasayurang gihatag ni Montejo, ang reklamante nangangkon nga nidangop kini sa kapolisan aron magpatabang kay nabiyaan kini sa iyang ig-agaw nga milarga padung sa Negros ug nadala hasta iyang kwarta.

Ang babaye ug ig-agaw padung unta sa Negros apan nihunong sila sa San Fernando kay adunay gipalit, apan nabiyaan kini sa ig-agaw sakay og bus.

Bisan sa pagusab-usab sa pamahayag sa maong reklamante, giangkon ni Montejo,nga naglagot ug nasagmuyo siya sa nahitabo.

Hinuon si Montejo miingon nga kun tumotumo lang kini, kinahanglang kasohan ang maong babaye tungod sa pagpakauwaw sa PNP.

Apan kun mapatud-ang tinuod ang reklamo gusto niyang makasohan ang tulo ka polis ug masilotan.

Gipaubos na ang babaye sa eksaminasyon aron gamitong suporta sa kasong ipasaka batok sa mga polis.

Ang mga gireklamo nag ranggo og Police Corporal, Police Master Sergeant ug dili pa siya sigurado sa usa ka polis matud ni Montejo.

Gipahinumdoman niya ang mga sakop nga kun dunay modangop kanila kinahanglang tabangan.

Ang bag-ong PNP Chief nga si Police Lieutenant General Guillermo Eleazar mibahad ng daan sa paglingkod niini kagahapong adlawa nga mas pahigpitan niya ang internal cleansing sa PNP ug taktakon sa serbisyo ang mapamatud-ang sad-an.

“Sa mga natitirang hoodlum in police uniforms, sisiguraduhin ko sa inyo, you will hate me. Hindi ako magdadalawang-isip na magtanggal ng mga tiwaling pulis dahil sa laki ng sweldo na binibigay sa atin ng ating gobyerno at benepisyo, sigurado akong madaming gustong pumalit sa inyo,” bahad pa sa opisyal.— IBM (BANATNEWS)