Hoops dome sa Lapu-Lapu ipa-accredit pa sa DOH

CEBU, Philippines — Gitinguha ni Mayor Junard Ahong Chan nga ma- accredited sa Department of Health (DOH)-7 ang hoops dome sa Barangay Gun-ob, Dakbayan sa Lapu-Lapu isip usa ka isolation facility. 

Matud ni Chan nga naandam na nila ang mga gikinahanglan nga dokumento alang sa mao nilang tinguha ug kasamtangan pa nga na-pending ang pagsumitir niini.                                  

Ang tipamaba sa DOH-7 Dr. Mary Jean Loreche nagkanayon nga ang hoops dome dili accredited isolation facility ug nagsilbi lang kini nga holding area sa mga pasyente sa COVID-19.

Nasayran nga niadtong niaging semana ang 36-anyos nga Overseas Filipino Worker (OFW) nga taga Dakbayan sa Toledo ang namatay diha sa nahisgotang pasilidad dihang kalit lang kining giatake sa iyang sakit sa kasingkasing.

Gi-quarantine sa maong facility ang nahisgutang OFW human kini nagpositibo sa COVID-19 swab test.                     

Si Chan nihimakak sa mga pasangil nga giingong gipasagdan nila ang pasyente diin walay ni-assist niining dihang giatake.

Nasayran nga adunay laing hulagway nga gi-post diha sa social media diin nakita nga ang usa ka babaye dali nga gitabang sa mga kauban niini nga pasyente.          

Matud ni Chan nga nagkalibanga  lang ang maong babaye ug  dili seryoso ang gihambin niining sakit. BDB (BANATNEWS)