Halapad nga clean up drive himoon sa siyudad

Cebu, Philippines — Gikatakdang mopahigayon og cleanup drive ang kagamhanan sa Dakbayan sa Sugbo karong Sabado Marso 20, 2021 diha sa daplin sa kasapaan ingon man sa mga coastal areas.

Suma pa ni Reymar Hijara, subcommittee chairperson sa Coastal Management Task Force (CMTF) nga ang ikatulong citywide cleanup operation, nga dunay tema nga  “Clean Cities, Healthy Citizens”, aduna nay dili mominus  2,500 ka volunteers gikan sa city government ingon man sa publiko ug nagkalain-laing grupo.

Ang mga mosalmot sa clean up naka- assign na ngadto sa laing laing barangay sa siyudad.

Suma ni Hijara nga ang opening ceremony himoon diha sa Il Corso Mall sa South Road Properties sa alas 5:30 sa buntag.

Gipaabot nga motambong sa seremonyas mao sila si Cebu City Mayor Edgardo Labella, Vice Mayor Michael Rama, ug Department of Environment and Natural Resources Secretary Roy Cimatu.

Lakip sa mosalmot sa kalihukan mao ang mga konsehal sa siyudad kinsa naka-assign na usab ngadto sa mga barangay.

Ang mga lugar nga apil sa cleanup mao ang Mahiga , Tinago Tejero Bridge- Kamputhaw River, T. Padilla Market - Kamputhaw Bridge, Ermita Coast, Guadalupe River , Pasil Coast, SRP Tower, Il Corso Coast.

Nonot sa nagpadayong hulga sa COVID-19 ang mga partisipante gikinahanglan motuman sa minimum health protocols sama sa pagsul-ob og face masks, face shields, gloves; ug pagmintinar sa physical distancing.

Ang mga heavy equipments alang sa makolekta nga basura sama sa dump trucks ug backhoe ang gi-andam na usab sa City Engineering Office, Department of General Services, ug Department of Public Works and Highways. (BANAT NEWS)