Kawani sa gobiyerno nga mo-parking sa bike lanes kasohan

Cebu, Philippines — Pasakaan og kasong administratiba ang mga tawong naghupot og government vehicles nga masakpan nga nagpataka lang og parking ilabi na sa bike lanes.

Kini maoy gibutyag ni Mayor Edgardo Labella sa Dakbayan sa Sugbo kagahapon human nigawas ang resulta sa assessment sa Sugbo Bike Lanes Board (SBLB) diin naobserbahan niini nga adunay government vehicles ang nakababag sa bike lanes.

Matud ni Labella nga nagpadala na siya og kamandoan sa tanang departamento sa city hall pinaagi kang Atty. Floro Casas Jr., city administrator nga dili ibabag ang ilang service vehicles diha sa bike lanes tungod kay dili siya magduha-duha sa pagsilot niini kon makalapas sa maong lagda.

Samtang iyaha usab nga hangyuon si Konsehal Dave Tumulak nga mohimo og ordinansa nga pasakaan ang multa sa mga motorista nga magpataka og plastada sa ilang mga sakyanan.

Nasayran nga sa niaging adlaw ang SBLB nisusi sa nahuman na nga bike lanes ug nakita niini nga aduna gihapoy mga sakyanan ang nakabalda sa bika lanes. Matud sa chairperson sa SBLB Gerry Carillo nga pipila sa ilang nakit-an nga nakababag sa bike lanes mga sakyanan sa city government, police cars, garbage trucks sa mga barangay, ambulansiya, ug uban pa.

Giangkon ni Carillo nga duna pay himuon nga improvements sa bike lanes ug usa na niini ang pagdugang og pintal nga mo-reflect aron maklaro kini sa bikers.

Dugangan usab kini og signages aron masayod ang katawhan nga adunay bike lanes.

Pipila sa nahuman na nga bike lanes nahimutang diha sa  V. Rama Street,  Gorordo, Salvador Street, Katipunan Street, Tres De Abril Street, Carlock Street., B. Aranas Street, Lakandula Street, Tupas Street/Spolarium, Magallanes Street, D. Jakosalem Street, Osmeña Boulevard, Lapu-Lapu Street, Urdaneta Street, M.J. Cuenco Avenue/ Central Nautical Highway, Imus Avenue, F. Go Chan Street, F. Cabahug, Street, Cardinal Rosales Avenue, ug General Maxilom Avenue. (BANAT NEWS)