Kustodiya sa batang lumad tukionon

CEBU, Philippines — Si Integrated Bar of the Philippines Cebu Chapter President Atty. Regal Oliva walay nakitang rason nganong dili ihatag sa Department of Social Welfare and Development Central Visayas ang kustodiya 16-anyos nga Lumad nga tinun-an ngadto sa iyang amahan nga maoy gimando sa Regional Trial Court.

Ang amahan sa 16-anyos nga lumad midangop sa korte pinaagi sa pagduso og petition for writ of habeas corpus.

Si  RTC Branch 20 Judge Leah Geraldez nitugot sa petisyon ni Lope Haictin, ug nimandu kang DSWD-7 Regional Director Rebecca Geamala ug Brenda Abilo, staff sa Crisis Intervention Center nga ihatag ang bata sa amahan.

Sumala pa ni OLiva, ang IBP miduso og manifestation ngadto sa korte aron i-release ang maong bata.  Apan ang DSWD-7 giingong niduso pa og motion for reconsideration may kalabutan sa habeas corpus.

Samtang si Police Lieutenant Colonel Wilbert Parilla, deputy director for operations of the Cebu City Police Office (CCPO) miingon nga sa wala pay mga militanteng pundok nga nagsige og piket sa gawas sa DSWD-7 aduna nay police visibility sa lugar sukad pa sa miaging tuig aron sa pagpatuman sa kahapsay ug kalinaw sa lugar.

Giklaro niya nga dili kini tungod kay naay gikustodiyang lumad sa maong ahensiya. Matud niya, dunay mga higayon nga mohangyo ang DSWD-7 og mga polis kini kung dunay daghang mga tawong dunay tuyo sa ilang buhatan kini aron mapatuman ang kahapsay ug kalinaw ug lakip usab ang mga minimum health protocols.— IBM (BANATNEWS)