Mga magtutudlo giawhag magpabakuna gyud

CEBU, Philippines — Giawhag sa Department of Education (Dep-Ed) Cebu Province ang mga magtutudlo sa Probinsya sa Sugbo nga mo- avail sa bakuna batok sa coronavirus disease (Covid-19) kun moabot na ang gitaganang bakuna para kanila. Si Schools Division Superintendent, DepEd Cebu Province Dr. Marilyn Andales nagkanayon lainlaing opinyon ang ilang nadungog gikan sa mga magtutudlo bahin sa bakuna, adunay uban nga interesado samntang duna say dili gusto ug nagduhaduha.

“Naa pud, natural feelings labi na naa kay existing nga mga sakit, kuan sila apprehensive what might be the effect kung naa, unya naa ko ani nga sakit. Pero naa poy isog naa pod uban ganahan,” matud ni Andales.

Giklaro hinuon niya nga kutob ra sila awhag kay dili man pugsanay ang pagpabakuna.

Karon nga nagsingabot na ang bakuna ug nipatuman na og luag nga restriction sa community quarantines, ang Dep-Ed Cebu Province nangandam na usab sa posibilidad nga ipatuman ang limited nga face-to-face classes.

Matud ni Andales nga ilang gi-finalize karon ang 12 ka public schools nga gi-identify sa Dep-Ed nga pilot area sa face-to-face classes hilabina nga adunay uban nga niatras nga mahimong pilot school tungod kay nisaka balik ang kaso sa covid-19 sa ilang lugar.

“Because sa ilang place sauna wala to sila, covid free but because nisulat sila nga increasing ilahang covid cases so ni decline sila to be a pilot school sa limited face to face” matod ni Andales. —IBM (BANATNEWS)