Turismo sa Dakbayan sa Sugbo gibuksan na

CEBU, Philippines — Gibutyag sa hepe sa Cebu City Tourism Commission Atty. Jocelyn Pesquera nga 100 porsyento na nga bukas ang turismo sa Siyudad sa Sugbo.

Pipila ka resort ug mga nindot nga talan-awon  karon sa kabukiran ang gitabangan usab nila sa pagkuha og accreditation gikan sa Department of Tourism.

Giangkon ni Pesquera nga naapektohan ang mga tourism site sa siyudad tungod sa pandemiya ug panahon na ang anam-anam nga pagbangon niini.

Gipahibalo usab ni Pesquera nga sa umaabot nga mga buwan ilusad usab sa kabukiran sa siyudad ang canyoneering, water rafting ug uban pa.

Matud ni Pesquera nga dili na unya kinahanglan nga moadto pa og lagyo nga lugar ang taga Siyudad sa Sugbo aron mosuway sa maong activities.

Nabatyagan usab ang pag-uswag sa “farm tourism sites” diha sa mga bukirang barangay.

Nasayran nga sikat kaayo karon ang nagkadaiya nga mga flower farm sa kabukiran ug ang Cebu City aduna usab kini mga tinagoang waterfalls.

Nagkanayon si Pesquera nga sa kataas sa panahon sa pandemiya nga gisagobang sa mga tawo usa sa pampaalim niini aron ma-relax mao ang pagbisita diha sa tourist sites.

Giingon walay paghupas usab ang heritage sites sa siyudad ingon man ang mga nindot kaayo nga hotel.

Matud usab ni Pesquera nga lig-on usab nga instrumento sa pag-ugmad sa mental health ang nindot nga mga talan-awon.

Gi-absorb usab sa kagamhanan sa siyudad ang 16 ka tour guide alang paggama og tour packages.

Sila mao ang mga freelance tour guide kaniadto nga nawad-an og panginabuhian tungod sa pandemiya. BDB (BANATNEWS)