CEBU, Philippines — Ang pangulo sa Cebu City Tourism Commission Atty. Jocelyn Pesquera nagkanayon nga positibo ang mahatag nga impact sa turismo sa Siyudad sa Sugbo sa pagdeklara unya sa National Museum of the Philippines isip “national cultural treasures” sa Basilica Minore del Sto. Niño ug ang imahen sa Santo Niño.
Gingkon ni Pesquera nga dugay na nga nailhan ang makasaysayanong bili sa Basilica ug sa imahen sa Santo Niño ug gilaomang modaghan pa ang mobisita sa siyudad tungod sa maong kalamboan.
Matud ni Pesquera nga nagpakita usab kini sa dakong importansiya nga gipakita sa mga taga Siyudad sa Sugbo sa pagpreserba sa kultura.
Sayo pa, namantala sa website sa Catholic Bishops' Conference of the Philippines ang report sa pag-anunsiyo sa chairperson sa National Historical Commission of the Philippines Rene Escalante kalabot sa maong deklarasyon.
Nasayran nga karong Abril 14, 2021 ipahigayon ang opisyal nga deklarasyon niini ug ang maong petsa masulod sa usa ka kalihokan sa selebrasyon sa “500 Years of Christianity in the Philippines”.
Nasayran usab nga usa sa mga kalihokan mao ang pagbunyag sa 500 ka bata .
Gikataho usab ang gikatakdang pagbisita dinhi sa nasud ni Archbishop Charles John Brown, Apostolic Nuncio to the Philippines. BDB (BANATNEWS)