Daghang dili makalimot kang Dodong Gullas

CEBU, Philippines — Ang pagtaliwan sa mga respetadong Sugboanon nga si Dr. Jose “Dodong” Gullas nakapakurat sa mga nakaila kaniya. Si Dodong nga usa ka educator, tigbalita, negosyante ug magbabalaod mitaliwan ning kalibotana niadtong Pebrero 25, 2021 sa edad 87. Gilupig siya sa bangis nga kanser sa pancreas nga usa palang ka buwan nadiskubrehan sa mga espesyalista diha kaniya.

Ilado si Dodong sa iyang pagka-hinayon manulti, kalmado ug kanunay nga may dalang pahiyom kun ikaatubang.

Usa siya ka tawong dunay malumong kasing-kasing dili lang sa iyang pamilya kondili hasta sa iyang mga empleyado diha sa The Freeman-Banat News ug sa University of the Visayas. Way laing makapatandog kang Gullas kondili ang talan-awong dunay mga tawong naglisod sa kinabuhi maong dali siya kaayong malukmay ug mangita’g paagi aron sila matabangan kutob sa maabot sa iyang kapasidad.

Naila siyang deboto ni  Senyor Sto. Niño, Sacred Heart of Jesus, Birheng Maria, ug ni Msgr. Teofilo Camomot.

Tungod sa iyang kinaiya nabantog si Dodong sa daghang mga Sugboanon nga naglakip sa mga prominenteng tawo sa sosyodad.

“Jose ‘Dodong’ Gullas was one of the most highly respected sons of Cebu. He was a loving family man, good friend, and kindhearted boss. A man of guts and vision, he accomplished much in his lifetime, more than most people can hope and dream for. As for me, he was not just a business partner at The Freeman; he was my Uncle Dodong. Farewell to our beloved Chairman. God speed. Till we meet again,” pamahayag pang The Freeman President Miguel Belmonte bahin sa pagpanaw sa chairman.

Si Cebu City Mayor Edgardo Labella nakahinumdom pa sa pagtabang kaniya ni Gullas sa dihang estudyante pa siya sa third year high school sa UV sa dihang gipili siyang morepresentar sa UV alang sa “Voice of Democracy” inter-school competition.

“Sir Dodong personally saw to it that I was fitted the best garments for that event – a Jusi Barong Tagalog paired with Marzotto wool pants. That was the first time I was able to wear them,” matud pa sa post ni Labella sa iyang Facebook.

Gitug-an sab niya nga gipaluyohan sab siya ni Gullas sa iyang pagdagan pagka-mayor sa siyudad hangtud karong naglingkod siya pinaagi sa pagsige og pahinumdoman kaniya nga magtarong sa panerbisyo ug magpabiling mapahiubsanon.

“I am deeply saddened upon learning that Jose “Dodong” Gullas has passed away. Cebu has lost a great man who has touched many lives, including mine,” dugang pang Labella.

Samtang si Cebu City Vice Mayor Michael Rama mihulagway sab kang Gullas nga usa ka maayong higala ug tigpaluyo kaniya sud na sa taas nga panahon.

“Sir Dodong was a man of humility beyond imagination. He was a great person with many accomplishments but yet you never heard him boast. He was an exemplary person. Through his determination, he managed to revive The Freeman into one of Cebu’s leading newspapers,” matud pang Rama. Gawas sa duha daghan pang mga inilang mga tawo sa Sugbo ang mipaabot sa ilang pahasubo sa banay’ng Gullas.

Si Atty. Michael Francis Hubahib, apo sa tuhod ni Atty. Paulino Gullas, ang founder sa The Freeman Newspaper niadtong 1919 dako ang paghangop sa pag-revive ni Gullas sa pamantalaan ug nilahutay hangtud karong mga panahona.

Ang The Freeman misaulog sa ika-100 ka tuig niini sa miaging 2019 usa sa gikahinamang okasyon ug gipangandaman og maayo ni Gullas.

Si Gullas naa karon gihaya sa Crystal Palace sa Cosmopolitan Funeral Homes sa Nivel Hills sa Lahug, Cebu City. (BANAT NEWS)