Patas nga financial assistance gitinguha

CEBU, Philippines — Nipasar og ordinansa ang Cebu City Council aron mausa ra o patas ang madawat nga financial assistance base sa job classification sa tanang barangay appointed employees.

Kini human nakita nga dili parehas ang nadawat nga ayuda sa mga barangay appointees sa mga kauban nila sa ubang barangay.

Ang barangay appointed employees naglangkob sa Gender and Development (GAD) Focal, barangay nutrition scholar (BNS), barangay health worker (BHW), barangay environmental officer (BEO), barangay garbage collector/ loader, barangay tanod, ug Lupong Tagapamayapa, ug uban pa.

Si Konsehal Lea Japson ang nigama sa maong ordinansa nga nag-ulohan og “The Uniformed Amount of Financial Assistance for All Appointed Barangay Employees of Cebu City Ordinance.”

Tumong niini nga mapaniguro nga dili maputol ang financial assistance alang sa mga empleyado sa barangay.

Base sa Section 4 , ang maong uniporme nga financial assistance kay manukad sa miaging tuig.

Ang financial assistance  sa mga empleyado kay P8,000 sa GAD Focal; P8,000 sa  BNS; P7,500 sa BHW; P5,000 sa  barangay garbage collector/ loader; P4,500 sa BEO; P4,000 sa lupong tagapamayapa; ug  P4,000 sa barangay tanod.

Kinahanglan nga mosumiter ang mga empleyado sa pangayoon nila nga rekisitos sama sa documentary requirements , appointment/ plantilla ug  Authority to Collect Honoraria nga pinirmahan sa mayor.

Gikan sa 30 ka adlaw sa pagsikad sa ordinansa , hatagan kini og gibut-aton sa Liga ng mga Barangay-Cebu City Chapter uban sa koordinasyon sa  City Legal Office ug Barangay Affairs Office. (BANAT NEWS)