CEBU, Philippines — Ang 13 ka fire stations sa Dakbayan sa Sugbo mopatingog sa ilang sirena 30 minutos sa dili pa ang curfew.
Kini ang gipahibalo ni Fire Chief Inspector Josephus Alburo, Cebu City fire marshal. Matud ni Alburo nga ang 13 ka fire stations dungan nga mopatingog sa ilang sirena sa alas 10:30 sa gabii, 30 minutos sa dili pa ipatuman ang curfew sa alas 11:00 sa gabii.
Ang pagpatingog sa mga sirena nagsugod kini naidtong adlaw nga Huwebes, Pebrero 4, 2021. Atol sa unang adlaw sa implementasyon sa maong pagpatingog sa sirena daghang residente sa siyudad ang nakurat tungod kay sayo kini sa gikatakdang oras apan niadtong higayona ang kabomberohan nitubag kini og alarma sa sunog diha sa Barangay Bulacao.
Dugang ni Alburo nga ang pagpatingog sa mga sirena aron sa pagpahibalo sa mga residente sa Cebu City nga kinahanglan na sila nga mosulod sa ilang mga panimalay gawas lamang sa mga sakop sa APOR. —BDB (BANATNEWS)