CEBU, Philippines — Natingkagol karon sa detention cell sa kapolisan sa Presinto 1 sa Mandaue City Police Office (MCPO) ang duha ka suspetsadong pusher kinsa nasikop atol sa ilang gipahigayong buy bust operation sa niaging gabii.
Si Police Lieutenant Waldo Batad, deputy chief sa Presinto 1 sa MCPO maoy nangulo sa nahisgutang buy bust operation.
Ang mga suspetsado giila sa kapolisan nga sila si John Mark Inoc, 18-anyos, taga Sitio Mahayahay, Barangay Pasil, Dakbayan sa Sugbo ug John Francis Villarin, 28, taga Barangay Kasambagan, Dakbayan sa Sugbo.
Matud ni Batad nga si Inoc kinsa nasakmitan og 30 ka gagmay’ng pakete nga shabu ilang nadakpan pasado alas 8:00 sa niaging gabii diha sa dalan Zuelleg, North Reclamation Area sa Barangay Centro sa Dakbayan sa Mandaue.
Samtang si Villarin nadakpan nila kini diha sa Barangay Subangdaku ug nasakmitan nila kini og 13 ka gagmay’ng pakete ug usa ka medium size nga paketeng shabu. —BDB (BANATNEWS)