Mga operator ug drayber sa TPUJ naglaom nga makabalik sa rota

CEBU, Philippines — Gilaoman karon sa mga operator ug drayber sa Traditional Public Utility Jeepney  (TPUJ)  nga tugotan na sila pagbalik sa pagpamasahero  sa kanhi nila rota sa Dakbayan  sa Sugbo.           

Naglakip sa kanhi nila rota ang dalan Manalili, Ayala Mall ug Country Mall sa Dakbayan sa Sugbo.           

Si Lucrecio Ytang, 47 –anyos, TPUJ driver sa 21-A nagkanayon nga dako og bintaha sa ilang pagpamasahero kon makabalik sila sa kanhi naandan nilang rota.              

Matud ni Ytang nga dili lang ang mga pasahero sa Dakbayan sa Mandaue ang ilang maserbisyohan lakip na usab ang mga pasahero sa Dakbayan sa Sugbo.           

Nasayran nga daghan sa mga TPUJ driver ang nawagtangan sa ilang kaikag sa pagbalik og pamasahero tungod sa kabalaka nga ang ilang kitaon sa pagpamasahero igo lang sa ilang pagpatobil og gasolina.           

Nunot niini, ang konseho sa Dakbayan  sa Mandaue ang nagpalabang og resolusyon nga naghangyo sa  kagamhanan sa Dakbayan sa Sugbo nga tugotan ang mga TPUJ  sa Dakbayan sa Mandaue nga makabalik sa naandan nilang mga rota nga maoy nahimutang sa ilang prangkisa.                        

Si Konsehal Jimmy Lumapas, chairman sa committee on transportation sa konseho sa siyudad ang nangamahan sa maong resolusyon.                       

Sayo pa, gatusan ka TPUJ sa Dakbayan sa Mandaue ang gitugotan sa pagbiyahe sa ilang mga rota sa Dakbayan sa Sugbo kaniadto apan  nahunong kini tungod sa hulga sa COVOID-19. —BDB (BANATNEWS)