Lalaki patay sa sunog sa junquera
CEBU, Philippines — Patay ang usa ka tawo sa sunog nga niulbo sa usa ka commercial ug pension house sa may Junquera Extension, Barangay San Antonio, Dakbayan sa Sugbo alas 2 pasado kagahapon sa hapon.
Usa ka lalaki ang nakalas nga giila nga si Estrilito Baiño, 35, ug nag-okupar sa usa ka lawak sa maong edipisyo.
Duha sab ka babaye ang naangol nga sila si Ergel Mandaue, 26, ug Vicenta Cabaguas, 62, kinsa pulos nakaangkon og first degree burn sa ilang tuo nga kamot.
Ang tulo ka andana nga building gipanag-iya sa usa ka Nenil Ongloyko.
Ang sunog giisa lang sa first alarm ug nakontrolar alas 2:59 ug hingpit nga na fire out alas 4:15 sa hapon.
Ang sunog gibana-bana nga nidanyos og P300 mil. Ang kabomberohan nga gipangulohan ni Fire Officer 2 Emerson Arceo mohimo pa og imbestigasyon may kalabutan sa hinungdan sa sunog.
Base sa inisyal nga kasayuran nga adunay kalit lang nga kayo sa usa sa mga lawak sa ikaduha nga andana apan susihon pa kini sa kabomberohan.
Daku ang pagtuo sa kabomberohan nga wala na kagawas ang biktima dihang niulbo na ang kayo. (BANAT NEWS)
- Latest
