Cebu, Philippines — Usa ka mabulokon nga kalihukan ang gihimo ni Archbishop Jose Palma sa Archdiocese of Cebu, uban ang Commission on the Laity ug Surrender to God Program nga gipangulohan ni Fe Mantuhac-Barino, human nila gibisita ang tulo ka mga lock-up jail sa Probinsya sa Sugbo, atol sa adlaw sa pasko.
Ang maong kalihukan maoy unang higayon, gawas sa Dakbayan sa Sugbo, matud pa ni Barino.
Lakip sa prisohan nga gibisita sa Arsobispo mao ang Consolacion, Liloan ug Compostela.
Ang arsobispo, nihatag sa iyang panalangin ingon man nanghatag og mokabat sa 800 ka hygiene kit ngadto sa mga piniriso o persons deprive of liberty kon PDL.
Si Barino, nanghinaot nga ang pasko makapaduol kanato sa Ginoo nga makita diha sa dagway sa mga PDL, tungod kay dili sila mga basura ug mga tawo usab.
Samtang nakig-uban usab si Mayor Junard Ahong Chan ug iyang sakop sa pamilya sa mga piniriso sa Lapu-Lapu City Jail niadtong Disyembre 24 aron paghatag og pinaskohan ngadto sa kapin 2,000 ka binilanggo.
Lakip sa ilang gipanghatag mao ang tsinelas, ug rosaryohan ug nagdala usab sila og mga pagkaon sama sa lechon alang sa noche Buena sa mga priso.
Samtang gidayeg sa mayor ang mga binilanggo tungod kay pulos kini nagsul-ob og face mask nga maoy usa sa gipatuman nga health protocol alang sa paglikay sa COVID-19 infection.— Romeo T. Limpangog (BANAT NEWS)