CEBU, Philippines — Mga kaso sa rabies sa Dakbayan sa Sugbo nagkamenos base sa record sa Department of Veterinary Medicine and Fisheries (DVMF).
Ang DVMF nakatala og 11 ka kaso sa rabies sa tibuok tuig 2020 ug gamay lang kini itandi sa mga kaso sa nilabay nga mga tuig.
Base usab sa record sa DVMF sa tuig 2019 adunay 13 ka kaso, samtang sa tuig 2018 nikabat sa 16 ka kaso, 19 ka kaso sa tuig 2017 ug 22 ka kaso sa tuig 2016
Sa tuig 2020, ang mga barangay nga adunay kaso sa rabies mao ang Kinasang-an, Binaliw, Bulacao, Ermita, Talamban, Hipodromo, Pit-os, Mabolo ug Babag.
Ang DVMF nanawagan sa mga nagbuhi og iro nga ipaubos sa regular nga pagpabakuna batok rabies ang ilang mga binuhi.
Sayo pa, ang DVMF nagkanayon nga na-edukar na ang mga nagbuhi og iro alang sa hustong pag-atiman sa ilang mga binuhi.
Si Dr. Jessica Maribojoc, in-charge sa Animal Health Division sa DVMF nipahimangno sa katawhan nga kon mapaakan og iro ang pasiunang buhaton hugasan dayon ang samad og modangop ngadto sa health center ug i-refer dayon kini sa city health alang sa medikasyon.
Dugang pa ni Maribojoc nga lapad ang ilang gibuhat nga information ug education campaign batok sa rabies. —BDB (BANATNEWS)