Negosyante malaumon nga dili na mapatuman ang total lockdown

Cebu, Philippines — Gilauman sa mga magpapatigayon sa Dakbayan sa Mandaue nga dili na mopatuman ang kagamhanan og total lockdown nunot usab sa hulga sa laing variant sa coronavirus disease nga mitumaw ning panahona.

Ang presidente sa Mandaue Chamber of Commerce and Industry (MCCI) nga si Steve Yu miingon nga dili total lockdown ang pagahimoon sa kagamhanan kon dili granular  lockdown lamang sa ingon nga makahinayhinay na og bangon ang nangabli na og balik nga mga patigayon.

Gitataw ni Yu nga hingpit gayod nga masinati ang paglukapa sa ekonomiya kon mahitabo na usab nga isuspenso pagbalik ang mga biyahe sa ayroplano ug mga barko.  Si Philip Tan nga consultant sa MCCI miingon usab nga daghan na sa gagmay nga patigayon ang hingpit na nga nanirado sa ilang operasyon.

Kini maoy epekto sa gipatuman nga lockdown sa milabay nga mga bulan tungod sa pagtumaw sa coronavirus disease 2019. (BANAT NEWS)