Kapolisan mopatuman sa IATF guidelines bisan panahon sa Pasko

Cebu, Philippines — Nagpahinumdom ang pangulo sa Kapulisan sa Dakbayan sa Talisay Police Major Gerard Ace Pelare nga bisan og adlaw sa Pasko nag-atubang gihapon kita og pandemya ug daghang guidelines sa Inter-Agency Task Force (IATF) ang kinahanglan gihapon sundon.

Lakip sa angayan nga tumanon mao ang curfew hours, pagdili sa inom gawas sa panimalay, mga menor de edad dili gihapon mahimong mogawas ingon man kadtong mga tawo nga dili makonsiderar nga Authorized Persons Outside Residence  (APOR).

"We must take into account that this is not yet the normal time that we celebrate Christmas, so the police under the guidance of the Mayor will always implement the IATF guidelines of course in due consideration in tradition and  religious activities that the church will be undertaking", sigon ni Major Pelare.

Nagkanayon si Major Pelare nga kadtong molapas sa IATF guidelines himoon gihapon nila ang maximum tolerance sanglit dili man kini usual crimes nga mopatuman gyud sila sa balaud.

Mohatag una sila sila og warning apan kun dili gyud sila mosunod sa hangyo sa kapulisan dunay mga Sangguniang Panlungsod ordinances nga mahimo ipahamtang aron masiguro nga matuman gyud ang guidelines nga gipagawas. ( BANAT NEWS)