150 pamilyang biktima sa flashflood gihataga’g pinaskohan

CEBU, Philippines — Moabot 150 ka pamilya sa Barangay Jagbuaya sa Lungsod sa Tuburan ang gitunolan og pinaskuhan sa The Freeman Foundation kagahapong adlawa.

Sagad sa mga gihatdan og pinaskohan nga relief goods mga naapektahan sa lapad nga flashfloods sa maong lungsod duh aka semana na ang nakalabay.

Ang gamay nga grupo ni The Freeman/ Banat News General Manager  Melandro Mendoza maoy personal nga nitunol sa maong mga hinabang diha sa barangay covered court inabagan sa ni Barangay Kapitan Joel Montebon.

Si Montebon nagpasalamat sa gihimo sa The Freeman/ Banat News nga pagpaabot og kalipay para sa iyang mga konstituwente ilabi na karong kapaskohan.

Ang maong kalihokan maoy silbing puli sa tinuig nga Christmas with Angels sa The Freeman Foundation nga diin imbitahon ang mga kabataang gikan sa mga lagyong barangay aron mag-Christmas Party ug maglingaw-lingaw ug mangaon tibuok adlaw sud sa usa ka piniling hotel uban sa paghatag kanila og mga pinaskohang duwaan, sapot  ug gamit sa eskuylahan . Apan gumikan niini pandemiya sa Covid-19 gidili na ang susamang mga kalihokan hinungdan nga gipaagi nalang kini sa pagpanghatag og relief goods alang sa mga labing nagkinahanglan karong panahona. Ang The Freeman Foundation nagtuo nga bisan pinaagi niining gamay nga pahalipay maulian niini ang kaayo ug suporta sa komunidad ilabi na sa mga tigbasa sa pamantalaang The Freeman, Banat News, The Philippine Star, PangMasa, Pilipino Star Ngayon ug Business World.—IBM (BANATNEWS)