Cebu City nakapangandam na sa Bagyong Vicky
Cebu, Philippines — Nakapangandam na ang Cebu City sa pag-abot sa bagyong Vicky, kini maoy gibutyag ni Cebu City Mayor Edgardo Labella atol sa pakighinabi niini sa mga tigbalita.
Ang Quick Response Team ug Cebu City Disaster Risk Reduction Management Office (CCDRRMO) naka-standby 24 oras sulod sa pito ka adlaw, sigon pa sa Mayor.
Samtang ang Department of Social Welfare and Services(DSWS) gimanduan na sab nga mag-andam sanglit dili matag-an kun unsay epekto sa bagyong Vicky.
Nagkanayon ang Officer-in-Charge sa CCDRRMO Ramil Ayuman gabii pa lang sa adlaw’ng Huwebes giandam na nila ang incident command post ug gipahinumduman na nilang daan ang mga Barangay Disaster Response nga alerto ingon man ang Quick Response Team sa Cebu City ug mga partners sa stakeholders.
“Karon nag-monitor ta, atong first responders mga barangay man mao need gyud ta sa ilang constant monitoring didto,” sigon ni Ayuman.
Sa pikas bahin, tungod sa bagyo gidid-an sa Philippine Coast Guard (PCG-7) ang mga biyahe sa tanang matang nga sakyanan sa kadagatan sa mga dapit nga gipaubos sa Storm Signal Number 1 sa Pagasa.
Ang naapektahang mga biyahe mao ang mga barko nga padung sa Cuyo Island, Cagayancillo Island sa Luzon, Negros Oriental, Bohol, Siquijor, Isla sa Camotes saVisayas, Dinagat Island ug mga lalawigan sa Mindanao.
Giawhag sa PCG-7 ang mga buot mobiyahe nga dili lang una modayon.
Dinhi sa Sugbo , nalakip sa Storm Signal Number 1 ang mga Dakbayan sa Lapu-Lapu-Lapu, Dakbayan sa Mandaue ug ang mga lungsod ug mga dakbayan sa amihanan ug habagatang bahin sa lalawigan. ( BANAT NEWS)
- Latest
