Cebu, Philippines — Miabot og 81 ka tawo ang nangadakpan sa gipahigayon nga tulo ka adlaw nga Sychronized Enhancement Management Police Operation (SEMPO) sa Dakbayan sa Talisay.
Suma pa ni Police Major Gerard Ace Pelare, pangu sa kapulisan sa siyudad nga lima ka search warrant labot sa ilegal nga drugas ug ilegal nga sugal ang ilang gipatuman.
Gilakip sab nila ang 94 ka tawo nga nakalapas sa lagda sa karsada, 15 ka tawo ang ilang nasikop nga nakuhaan og ebendensya nga drugas nga 34 gramos nga nibalor og P293 mil.
Samtang nakadakop sab sila og 23 ka sugarol, walo sab ka tawo ang nadakpan nga subject sa warrant of arrest.
Upat ang nitahan sa ilang ilegal nga armas ug 35 ang nakalapas sa lagda sa health protocols.
Si Pelare nagkanayon nga padayon ang ilang trabaho sa pagdakop sa mga tawo nga ilegalista. Ang mga nadakpan gikatakdang pasakaan og kaso. — Gabriel C. Bonjoc/MEL
Mga polis sa Talisay nagsugod na sa operasyon batok illegal nga pabuto
Gisugdan na sa kapolisan sa Dakbayan sa Talisay ang paglibot sa mga lugar diin adto mamaligya og pabuto ang pipila ka manindahay.
Kini human nasuta sa kabomberohan nga duha lang ka negosyante ang nakakuha og permit alang sa pagbaligya og pabuto.
Si SFO2 Guiller Pegarido nagkanayon nga duha lang ka mall ang nakakuha og permit busa sila lang ang gitagaan og higayon nga makabaligya.
Ang ila sab nga baligya mao kadtong fireworks nga makita sa kalangitan ug adto mobuto sa ibabaw nga bahin.
Samtang si Police Major Gerard Ace Pelare, pangu sa kapulisan sa Dakbayan sa Talisay niingon nga kadtong walay permit makonsiderar nga ilegal busa dakpon gyud sila kun mamaligya.
Samtang susihon usab sa kabomberohan kadtong mga tindahan nga mamaligya og mga sub-standard nga dayan-dayan sa pasko. ( BANAT NEWS)