CEBU, Philippines — Mihimo na karon sa ilang lakang ug preparasyon ang Cebu City Market Operations Division sa pagdasok na unya sa mga tawo ning panahon sa Pasko ilabi na nga mibalik na ang mga jeepneys.
Dakong hagit para sa MOD ang pagpadayon sa minimum health protocol sa Carbon Public Market ug paglihuk sa mga trak nga maghatud ug kuha og mga produkto tungod kay usahay sila maoy makabara sa mga tawo ug mao na hinuoy hinungdan nga magkasikit ug magdasok ang mga mamalitay.
Si Irvin Caballes, ang pangulo sa MOD, mibutyag nga nakig-alayon sila sa kapulisan ug barangay nga ipatuman ang one way movement sulod sa merkado.
Si Caballes, mitug-an ang sudlonong bahin sa merkado, duol sa Warwick Barracks mao karoy himuong diskargahanan sa tanang mga produktong dad-on ug kuhaon sa maong merkado aron di na sila kinahanglang mosuot-suot sa sud. —IBM (BANATNEWS)