Cebu, Philippines — Giawhag ni Cebu City Councilor Dave Tumulak ang mga manimbahay nga magdala og kaugalingon nga bangko sa higayon nga mosimba sa misa de gallo.
Kini ilabi na ug dili na makasulod sa simbahan tungod kay gilimitahan man gihapon ang mga tawo nga mosud sa simbahan aron malikayan ang pagkatap sa COVID-19.
Suma pa ni Tumulak ang mga simbahan mipili nga gamiton ang ilang tugkaran aron pag-akomodar sa mga gustong motambong sa Misa de Gallo apan kinahanglan strikto tumanon ang social distancing, ug pagsul-ob og face mask. Si Konsehal Tumulak mao ang gitahasan ni Mayor Edgardo Labella pag-coordinate sa mga simbahan alang sa pag-umol og guidelines sa misa sa kadlawon.
Sigon sa Konsehal, ang mga simbahan mohimo gihapon og live streaming sa mga misa, ug posible nga dunay kalangay unya sa paggawas sa mga manimbahay tungod kay nauyunan nga ang paggawas sa manimba himoon kada row.
Samtang sa Mandaue, ang kaparian sa walo ka mga parokya nagka-uyon nga mopahigayon og Misa de Gallo human sa tigum tali ni Mayor Jonas Cortes ug gitugot usab ang pagmisa diha sa mga gymnasium o mga lugar nga lu-ag nga makasulod ang mga manimba.— Caecent No-ot Magsumbol, Decemay P. Padilla, Romeo T. Limpangog ( BANAT NEWS)