Cebu, Philippines — Duha ka nagpailang sakop CPP-New Peoples Army nitahan sa ilang kaugalingon ug duha ka armas sa kampo sa 703rd Mobile Force Batallion-7 nga nahimutang sa Brgy. Li-ong, sa lungsod sa Dumanjug niadtong Nobiyembre 22, 2020 sa gabii.
Ang mga mitahan giila nga silang Yolo Fat, 21, residente sa maong barangay ug Melborn Sabio, 20, tagta Brgy. Calaboon sa mao gihapong lungsod.
Ang duha mitahan sab sa ilang dala nga .357 revolver ug .38 caliber revolver uban sa mga bala niini.
Matud pa sa report gikan kang Police Lt. John Mondaya, ang company commander sa maong kampo, ubos sa pagpangulo ni Police Lt. Colonel Norberto Batoon Delmas, ang duha kalit nga nibutho sa ilang detachment.
Matud pa nagpaila ang duha nga sila mga miyembro sa CPP-NPA Squad 3 Striker Unit nga nagbase sa Guihulngan City sa Negros Oriental.
Giingon nga nakadesider ang duha nga mobalik sa sabakan sa gobiyerno tungod sa kalisdanang ilang giagian didto sa kabukiran nga matud sa duha kanunay naa sa kakuyaw.
Nanawagan ang duha sa mga kaubanang rebelde nga manganaog ug motahan na sa gobiyerno, kay diha sud sa kalihokan, bisan pagkaon ug bisan desenteng katulgan lisud kaayong matagamtaman. (BANAT NEWS)