Mahal nga palaliton resulta sa sunodsunod nga bagyo?

CEBU, Philippines — Nipasangil ang mga manindahay sa merkado sa Tabunok Dakbayan sa Talisay nga nimahal ang palaliton gumikan sa sunod-sunod nga bagyo nga nasinati.

Si Sarah Badajos, tindera og isda niingon nga naa sa P10 ngadto sa P50 ang pagtaas sa presyo sa mga pagkaon gikan sa dagat.

Matud pa niya nga ang kilo sa bangus kaniadto naa lang sa P100 apan karon P140 na, ang tabugok nga tag P120 ang kilo karon P160, ang litob ug latu nisaka sab og P40.

Si Buddy Dela Peña, mamaligyaay og bugas miingon nga ang presyo sa sako nila sa bugas nga motimbang og 50 kilos nisaka sa P50 ngadto sa P160.

Ang mga lamas, utanon ug prutas adunay pagsaka sa P10 ngadto sa P20 pesos.

Usa sa mga mamalitay nga si Auring niingon nga wala siyay mahimo kundi mo ilin-ilin nalang sa iyang budget.

Ang mga mamaligyaay pulos mirason nga ang pagmahal sa palaliton resulta sa sunod-sunod nga bagyo nga nasinati ilabi na sa Luzon area.

Samtang mahimong ma-priso ang mga tindero ug tindera nga manikas sa ilang timbangan.

Kini maoy gibutyag ni Winefredo Bas, nagdumala sa Tabunok Public Market.

Una niini, ang ilang buhatan nibalik sa paghimo og operasyon labot sa mga timbangan nga tikasan gani 25 ka timbangan ang ilang nasakmit nadtong miaging adlaw.

Nagkanayon si Bas nga ang manindahay nga nanikas mahimong makamulta og P200 ngadto sa P5 mil ug mamahimo pang mapriso sud sa tulo ka buwan ug dili na makatinda og balik kun magpadayon sa ilang binuang.

Dugang pa ni Bas nga kung magduda sa timbang ang mamalitay sa ilang gipalit mahimo nila kining timbangon pag usab sa ilang timbangan ng bayan nga naa rasad sulod sa merkado.— MEL (BANATNEWS)