Kalihukan sa Pista Senyor ipakita sa social media
CEBU, Philippines — Mga debotos sa balaan nga bata Sr. Sto. Niño, gidasig nga mosunod nalang sa mga kalihukan online kung dili man gayud sila makahimo sa pagbiyahe sa Siyudad sa Sugbo.
Kini ang gitug-an sa tigpamaba sa Basilica Minore Del Sto. Nino Fr. Ric Anthony Reyes.
Matud pa ni Reyes, tungod kay anaa pa man ang covid-19 ug gilikayan usab ang pagtapok sa daghan nga mga tawo, ilang giawhag ang mga debotos nga kung dili sila makahimo sa paglabang ug pagbisita sa simbahan sa basilica mahimo ra sila mosunod sa social media page sa Basilica Minore del Sto Niño de Cebu.
Sumala pa ni Reyes, sama sa naandan ang simbahan padayon ug hugot gihapon nga nisunod sa mga gipatuman nga minimum health standard ug safety protocols alang sa tanang mosulod sa simbahan.
Dugang pa ni Reyes, mahimo ra makasunod sa mga misa novena sa online ang mga debotos tungod kay ilaha man ipahigayon ang tanan mga kalihukan.
Nasayran daghan sa mga dagko nga kalihukan sa kapistahan sa balaan nga bata ang gioktaba tungod sa paglikay nga makamugna ug mass gathering tungod sa covid-19. —MEL (BANATNEWS)
- Latest
