Panaygon gitugot sa Daanbantayan

CEBU, Philippines — Gitugotan sa lungsod sa Daanbantayan ang pagpanaygon sa lungsod karong panahon sa Pasko.

Usa kini sa mga nasabotan sa Inter-Agency Task Force on COVID-19 atol sa ilang tigom gipangulohan ni Mayor Sun Shimura.

Sa Municipality of Daanbantayan official Facebook page nagkanayon nga ang mga grupo ug indibidwal nga manaygon o mag caroling panahon sa kapaskuhan tugotan ra apan mangayo og permit sa barangay ug kinahanglang mag sul-ob og face mask.

"I said for the essence of Christmas and of course ang mga tawo pud mag fundraising tugotan man gani nato ang sabong kani na ba intawon sila.." matud ni Shimura.

Matud sa mayor nga kinahanglan lang gyud nga adunay permiso gikan sa barangay ug mosunod sa health protocols aron makapanaygon o caroling.

Ang lungsod sa Daanbantayan nitugot sa sabong sa lungsod matag Domingo apan kinahanglang higpit ang pagsunod sa health protocols.

Sa mga mouliay nga OFWs, ang mga kaugalingon nga sakyanan maoy mamahimong mokuha nila inay ang sakyanan sa LGU gikan sa hotels padung sa ilang mga panimalay.

"Kon maatol nga walay schedule sa antigen test sa RHU tungod kay natumong og weekend, makauli gihapon sa balay ang OFW apan dili makagawas hangtod nga mapailawom na sila sa antigen test ug negative ang resulta. Kinahanglan mokuha og barangay certification aron maisyuhan og mayor's certificate," matud pa sa post sa lungsod. —IBM (BANATNEWS)