Pitakang dunay kwarta giuli sa traffic enforcer sa Talisay

CEBU, Philippines — Sakop sa City of Talisay-Traffic Operation Development Authority (CT-TODA) ang gibaha og pagdayeg human siya miuli sa kwarta nga iyang nakit-an niadtong miaging adlaw.

Si Ronald Restauro, sakop sa CT-TODA nga nadestino sa Barangay Tabunok nakakita og pitaka. Iya kining gipunit ug nakit-an nga adunay sulod nga  P7mil.

Wa magduha-duha si Restauro sa pagturn-over sa salapi ngadto sa iyang labaw nga si Gino Mabuyo.

Nahibaw-an nga si Annaliza Catipay ang tag-iya sa kwarta human siya nibalik sa lugar kun diin siya nahinumdom nga nawagtang ang iyang pitaka.

Iyang pagtuo nga dili na mabalik ang iyang salapi nga iyang gamiton sa pagpahiluna sa patay’ng lawas sa iyang igsuon.  Sa iyang kalipay nga nabalik ang iyang kwarta nakahilak siya.

Si Jonathan Tumulak, traffic czar sa siyudad  miingon nga moduso siya og report ngadto sa konseho labot sa iyang sakop nga matinud-anon.

Matud pa niya nga ubay-ubay na sa iyang sakop ang nakadawat og pasidungog sa konseho sa ilang gipakitang serbisyo nga matinud-anon. /IBM (BANATNEWS)

Show comments