Nobenaryo sa pista sa Birhen sa Regla higpitan sa kapolisan

CEBU, Philippines — Higpit nga gipangandaman  sa kapolisan ug mga sakop sa  City  Traffic  Management System (CTMS) ang opening salvo  ug nobenaryo sa kapistahan  sa Birhen sa Regla, patron  sa Dakbayan sa Lapu-Lapu  nga magsugod karong Huwebes, Nobyiembre 12, 2020.

Himoon usab ang paglibot sa Imahen sa Birhen sa Regla sa mga barangay sa dakbayan.          

Gipahibawo ni Father Bong Corpus, parish priest sa National Shrine sa Birhen sa Regla  nga magsugod kini sa pag-overnight sa Balaang Imahen sa Birhen sa Regla  adto sa City Hall.                                             

Gikan sa City Hall mopaingon kini ngadto sa Barangay Mactan, Bankal, Pajac ug adto kini mogawas sa Maribago-Marigondon, Marigondon highway.

Gikan  sa Marigondon Crossing ang Imahen sa Birhen sa Regla  mopaingon sa Barangay Basak ug Barangay Gun-ob dayon na sa iyang pagbalik sa iyang simbahan sa Barangay Poblacion.

Adunay unom ka hugna sa matag adlaw nga nobena nga magsugod sa alas 5 sa buntag hangtud sa alas 6 sa gabii.

Higpit usab nga ipatuman ang mga safety ug health protocols alang sa mga deboto sa ilang pagsulod ug paggawas sa simbahan human sa pagtambong sa nobenaryo.   

50 porsiyento lamang sa capacity sa simbahan ang tugotan nga makasulod  ug ang uban nga dili na masulod adto na sa City Auditorium nga giandam usab sa lokal nga kagamhanan nga nahimutang tapad sa simbahan. /MEL (BANATNEWS)