Cebu, Philippines — Gipangandaman karon sa Cebu City sa pagsulod sa Tropical Depression Tonyo nunot sa nakitang kadaot sa kataposang bagyo nga miigo sa nasud partikular didto sa Bicol region sayo ning semanaha.
Sigon ni Konsehal Dave Tumulak, chairman sa Committee on Disaster Risk Reduction Management maapektuhan ang Visayas sa maong bagyo nga motadlas sa amihanang bahin sa lalawigan.
Tungod niini gi-posisyon nang daan ang mga heavy equipment sa siyudad didto sa kabukiran sa North, South ug Central sugod kagahapong adlawa aron nga maoy moresponde dayon paghawan sa mga debris o pagdahili sa yuta.
Karong adlawa sa alas sa 5 sa hapon kun paanglitan adunay pag-uwan ang kagamhanan sa siyudad mopakatap og mga bus aron dunay kasakyan ang mga tawo kun mangatanggong sa baha.
Mimando si Mayor Edgardo Labella sa Department of Social Welfare and Services (DSWS) nga sugod karong adlawa dunay mag standby nga personnel sa nahisgutang mga lugar aron makatabang dayon sa mga tawo.
Sugod sab kagahapong adlawa ang Department of Engineering nananguykoy sa mga kanal ilabi na sa flood prone area ug gipasidan-an sa tanang mga barangay bahin aning bagyong Tonyo. (BANAT NEWS)