Managkapuyo nanglayat
CEBU, Philippines — Nangaangol ang manag live-in partners human sila nakitang nangambak sa pangpang sa Sitio Tan-awan, Barangay Guadalupe Carcar City Miyerkules sa gabii.
Ang nangaangol mao ang 25-anyos nga lalaki ug kapuyo ang 21 anyos nga babaye (mga pangalan gipugngan sa Banat News aron proteksyonan ang babaye) pulos taga Lungsod sa Balamban.
Nasayran nga diha na magpuyo ang babaye sa Barangay Guadalupe tungod nagtrabaho kini sa usa ka poultry shop sa maong siyudad.
Matud pa ni Police Corporal Louie Jane Tagra, Assistant WCPD sa Carcar City Police Station base sa imbestigasyon sa ilang imbestigador giingong niabot ang lalaki sa Carcar gikan sa Balamban aron papaulion ang iyang kapuyo.
Apan giingong nagdumili ang babaye tungod kay mangulata kini. Gitug-an ni Tagra, sa wala pa mahitabo ang paglayat, giingong nakit-an ang duha nga nagkuyog sa maong lugar ug nagkalalis og maayo.
Matud pa nga tungatunga sa ilang panaglalis gikatahong gigakos sa lalaki ang babaye ug gisampongan ang baba niini dayong layat ngadtp sa pangpang sama sa naghikog.
Apan swerte nga dili kaayo lawom ang gikahagbungan sa duha maong wala kaayo nakaangkon og grabeng kadaut sa lawas ang babaye, apan kinahanglang magpabilin pa sa tambalanan ang human kini giingong nabalian og bukog.
Sumala pang Tagra ang babaye dili na mopasaka og kaso sa kaipon apan gusto niini nga makigpinirmahay aron hingpit makigbuwag hinungdan giawhag kini nga moadto sa barangay kung diin sila nagpuyo aron mag-atubang ug magsabotay. /IBM (BANATNEWS)
- Latest
