Ceres gibaharan

CEBU, Philippines — Shape up or ship out. Mao kini ang bahad ni Cebu City Mayor Edgardo Labella sa Ceres Liner nunot aning sagunson nga mga aksidente sa kadalanan nga nalambigit ang mga bus sa maong kompanya, apil ang panagbanga sa ilang bus ug ambulansiya diin siyam ang nangaangol diha sa North Reclamation Area.

Gawas sa Cebu City , ang Ceres buses nalambigit sab sa ubang mga aksidente sa mga silingang dapit sa dakbayan diin aduna gyuy nangamatay (sa Mandaue City ug Consolacion).

“We would make the admonition nga sobra na ni kadaghang aksidente. It is alarming, so ato silang gipatawag with the other concerned agencies,” si Labella miingon.

Mibahad si Labella nga kun dili mag-amping ug kanunay gihapon malambigit sa aksidente ang maong mga bus, mopagawas siya og kamandoan nga di na sila tugotan pang makapamasahero dinhi sa siyudad. “If they cannot shape up, we can stop allowing them to travel the Cebu City streets, if only to prevent the loss of lives to our people in the City of Cebu,” si Labella miingon kay matud niya daghang mga bus nga nagpaabot nga mahimong maoy ipuli kanila.

“Naa may daghang alternate buses unya ang MyBus, they have reserved additional 20 buses. I’ve talked to them (Mybus). Unya, of course, the other independent buses, as long as they are roadworthy,” si Labella miingon.

Matud ni Labella kinahanglang mapasalig sa Ceres nga luwas ang mga residente sa Cebu City samtang sila nag-operate dinhi sa siyudad.

“They should shape up. One life lost is a life lost. We do not want our people in the city to suffer risk and danger because of reckless driving of the vehicles,” matud niya.

Apan samtang si Labella nibahad sa Ceres, si Leo Rey Yanson, presidente ug CEO sa Vallacar Transit nga nag-operate sa Ceres Liner gihatagan og plaque of appreciation sa Office of the Presidential Assistant to the Visayas (OPAV) tungod sa kontribusyon sa kompanya sa kombate batok sa COVID-19.

Ang Ceres buses gipabiyahe sa kadalanan sa Cebu City aron moabag sa tranportasyon sa publiko ilabi na para sa mga frontliners sa dihang ubos pa sa lockdown ang siyudad.

Si Land Transportation Franchising and Regulatory Board (LTFRB)-7 Director Eduardo Montealto, Jr. niadtong adlaw’ng Domingo mimando sa maong kompanya nga ipaubos sa drug test ang 300 nila ka mga drayber sa amihanang Sugbo.

Kadtong masakpang tiggamitan og illegal nga drugas dili na pabiyahion, ang mga negatibo mopaubos og driver’s examination nga ihatag sa ilang ahensiya. Di sila tugotang makamaneho hangtud di sila makapasar.

Pito na ka mga bus sa maong kompanya ang nalambigit sa aksidente sugod sa miaging buwan diin duha sa mga naligsan ang nakalas. Ang labing uwahi nahitabo sa Lapu-Lapu City nga nalambigit gihapon sa motorsiklo. The Freeman/IBM