CEBU, Philippines — Usa ka security guard ang patay ug usa usab ang angol sa nahitabong pagpamusil diha sa Sitio Alumnos, Riverside Barangay Basak San Nicolas ning Dakbayan sa Sugbo niadtong Biyernes.
Ang nakalas mao si Ernesto Gonzales, 34, gwardiya sa usa ka pribadong tulonghaan sa maong lugar. Samtang nasamdan si Marissa Echevarria, 49, residente sa maong lugar. Wa pay matumbok ang kapolisan kun kinsa ang mamumuno apan giingon nga residente lang kini sa maong lugar.
Matud pa ni Police Corporal Noel Timagos nagkaon ang biktima sa maong lugar sa dihang kalit niabot ang mamumuno ug gipusil kini sa ulo apan naigo sab sa tiyan si Echevarria. Dali nga gidala sa tambalanan si Echevarria samtang si Gonzales gideklarar kini nga patay diha-diha dayon.
Padayon pa karon nga nisusi ang kapulisan sa nahimutangan sa maong mamumuno ug gisusi kun unsay motibo niini sa pagpusil sa gwardiya. —Rowena D. Capistrano/IBM
Kabataan batok drugas gilusad
Pormal nga gilusad ang grupo sa kabataan nga motabang pakigbatok sa ginadiling drugas diha sa Dakbayan sa Talisay.
Ang grupo pinangulohan sa Sangguniang Kabataan (SK), youth organizations ug Local Youth Development Office (LYDO) naghiusa ug gitawag ang ilang grupo nga Kabataan Kontra Droga at Terrorismo (KKDAT).
Si Mayor Gerald Anthony “Samsam” Gullas Jr. nalipay gumikan kay dili lang ang kapulisan ug mga opisyales ang nakigbatok sa drugas kay mipakita og interes ang kabataan nga maoy kasagaran humok madani sa makabuang ug makamatay nga bisyo.
Matud pa sa mayor nga upat ka estratehiya ang ilang gihimo sa nagpadayon nga Oplan Limpyo Talisay. Una mao ang subsob nga pagdakop sa mga namaligya ingon man manggamitay og ilegal nga drugas.
Ikaduha mao ang senemana nga pagbisita sa mga barangay sa pagagni sa mga molupyo sa pagbiya na sa ilang bisyo. Ang pagpaningkamot nga mahimong drug cleared ang usa ka barangay lakip na sab sa ilang tinguha.
Ikaupat mao ang pagpaubos sa rehab sa mga tawo nga nagsalig nalang gyud sa drugas. “Importante kaau ang role sa KKDAT dri. We should all work together to convince the community to help as well,” matud pa ni Gullas. Nagtuo si Gullas nga dili sila magmalampuson kung kuwang ang gipakitang tabang sa komunidad. /IBM (BANATNEWS)