CEBU, Philippines — Giklaro ni Cebu City Mayor Edgardo Labella nga human ma-identify ang mga istraktura nga giingong nakababag sa waterways sa siyudad nagpagawas dayon sila og compliance order pinaagi sa City Legal Office.
Ang maong katin-awan gipadayag sa mayor gumikan sa mga taho nga matud pa wa silay gihimo human ma-identify ang mga istraktura nga nakababag sa mga waterways.
Una niini mipasalig ang mga tag-iya sa mga estraktura nga boluntaryong moguba sa ilang mga edipisyo nga nakaali sa agianan sa tubig.
Lakip sa gipakita ni Labella mao ang compliance order nga gipadala nila sa White Knight Hotel Cebu diha sa General Maxilom Avenue nga nagpahibawo nga boluntaryong nilang gub-on ang matod pa illegal steel matting o structure nga nakita ilawom sa driveway sa maong establisamento.
Ang mga establisamento gihatagan og 15 ka adlaw sa pagtuman sa compliance order nga gipagawas sa kagamhanan sa siyudad. (BANAT NEWS)