13 brgy sa Lapu-Lapu wa nay bag-ong kaso
CEBU, Philippines — Adunay 13 ka mga barangay sa Lapu-Lapu City nga wala na maka record og bag-ong kaso sa coronavirus sa milabay nga semana sumala pa ni Nagiel Bañacia, ang pangulo sa Lapulapu City Disaster Risk Reduction and Management Office. Matud pa ni Bañacia, ang mga barangay nga wala nay record naglangkob sa Pusok, Maribago, Caubian, Suba-basbas, Pangan-an, Baring, Tingo, Caohagan, Talima, Tungasan, San Vicente, Sabang ug Caw-oy. Sagad niini nga naa sa isla.
Ang Pusok, maoy kanhi epicenter sa virus sa siyudad apan karong bag-o wala nay nadugang nga bag-ong kaso sulod na sa tulo ka semana.
Gitug-an ni Bañacia nga nakab-ot tungod sa epektibong pagtuman sa mga tawo sa health safety measures dili lang sa trabahoan apan lakip na usab ngadto sa mga panimalay.
Awhag ni Bañacia, nga kanunay lang motuman sa tanan mga health protocols nga gipatuman ug dili mokompyansa sa tanan higayon kay anaa lang gihapon ang Covid-19. /IBM (BANATNEWS)
- Latest
