CEBU, Philippines — Miasumer na sa katungdanan ang duha ka mga barangay konsehal sa duha ka barangay sa Dakbayan sa Mandaue isip temporaryo nga mohulip sa nasuspenso nila nga barangay kapitan.
Si Barangay Konsehal Celso Pañares nga maoy numero uno nga konsehal sa Barangay Alang-Alang maoy mihulip kang Barangay Kapitan Patricio Soco ug si Barangay Konsehal Rodrigo Bering sa Barangay Centro mao usab ang mihulip kang Kapitan Ignacio Cortes II.
Si Kapitan Soco sa Alang-Alang ug Kapitan Cortes sa Centro ang gisuspenso og 60 ka adlaw sa buhatan sa Department of Interior and Local Government (DILG).
Ang direkor sa DILG sa Dakbayan sa Mandaue nga si Kenneth Kilat maoy mikumpirmar sa gipatuman nga suspension order sa Ombudsman batok sa duha ka mga barangay kapitan.
Naglambigit ang maong suspensiyon sa gialigar nga anomaliya sa Special Amelioration Program (SAP) nga gipasiugdahan sa nasudnon nga kagamhanan.
Gipasabot ni Kilat nga ang duha ka mga barangay kapitan gipasanginlan nga nakahimo og kalapasan sa lagda sa SAP distribution maoy hinungdan nga sila gisuspenso.
"Investigation pa dili pa gyod na judgement," nagkanayon si Mandaue City DILG Director Kilat. "Investigation is still going, in order for their office nga dili maka-influence sa resulta sa investigation mao nga gi-preventive suspension sila."
Sa nasayran 89 ka mga barangay kapitan lukop nasud ang gipaubos sa preventive suspension sa Ombudsman tungod usab sa gisang-at nga reklamo sa buhatan sa DILG may kalabutan sa anomaliya sa SAP distribution. /MEL (BANATNEWS)