CEBU, Philippines — Mireklamo ang mga manindahay og buwak sa Freedom Park tungod kay wala gyud sila kabawi sa ilang pahunan gumikan kay menus ang palit sa buwak bisan paman nagkaduol na ang pag-obserbar sa kalag-kalag. Kun ang kaulohah dunay sila’y Dangwa Flower Market, ang Cebu City dunay Freedom diin nagkalain-laing klase sa buwak ang makita ug mapalit sa mga tawo.
Apan kun itandi ang sitwasyon sa mga nakalabay nga katuigan ug karon dako gyud ang kalahian, hinungdan nga naguol ang mga manindahay.
Si Evelyn Aragon, usa sa mga manindahay og buwak sa Freedom Park mibutyag ang maong negosyo sa iyaha pa gyud nga inahan ug mao kini nakapahuman nila og eskwela.
Apan si Aragon miingon nga gumikan sa COVID-19 pandemic apektado gyud ang ilang halin, kun sa miaging tuig nakaginansiya gyud sila sa ilahang negosyo apan karon halos tanan wala kabawi sa ilang puhunan.
“Sama ani pwerteng daghanan unya way customer, wala gyud, kargado ra tindera wala’y customer gyud, ang chances namo ani ang mga suki. Wala man mi close, ang menteryo lang gyud ang close so apektado kay since gi close ang menteryo so wala sad gyud mao gyud na, apektado gyud mi since naay schedule nga close ang menteryo unya naa pa gyuy curfew ipasira gyud mi diri og 8, last year is 24 hours mi, alas 8 close gyud kay og di ka mag close i-demolish man kuhaon imong buwak”, ni Aragon pa.
Kaniadto Oktubre 26 o 27 pa lang sugod na sila og deliver sa laing lugar sama sa Iloilo ug uban pang lugar sa nasud apan karon wala zero matod pa sila niini, ug daku gyud ang ilang alkanse. /MEL (BANATNEWS)