Kalihukan sa pista sa Birhen sa Regla kanselahon

CEBU, Philippines — Gitinguha ni Lapu-lapu City Mayor Junard Ahong Chan ang pagkanselar sa matag gabii nga kalihokan alang sa tinuig nga pangilin sa Birhen sa Regla karong Nobyembre 20 ug 21, 2020.

Gipasabot sa mayor nga tumong sa pagkanselar sa mga kalihukan mao ang paglikay sa pagkatap sa COVID-19. Hinoon magpadayon ang mga misa ug nobenaryo sa simbahan alang sa kapistahan sa Birhen sa Regla apan dili daghan ang pasudlon aron malikayan ang pagdasok sa mga tawo

Matud pa ni Chan nga labing mahinungdanon nga mo-fucos lang sa religious aspect sama sa misa.

Si Chan nagkanayon nga gitinguha niya nga magpadayon gihapon ang fluvial procession apan higpit gyud nga sundon ang kamanduan sa Inter-Agency Task Force on the Management of Emerging Infectious Diseases. "Kana maoy gitunan nato nga mahitabo siya, pero limited lang ang mosakay sa matag pump boat alang sa pag-maintain nato sa social distancing."  dugang pa ni Mayor Chan.

Samtang giawhag ni Mayor Chan ang katawhan nga motabang aron malikayan ang krimin sa ilang lugar pinaagi sa pagtaho sa illegal nga kalihukan ngadto sa kapulisan.

Ang panawagan giluwatan ni Chan, human ang Lapu-lapu City Police nakasakmit ug 22 ka kilos nga ginadiling drugas nga mobalor ug dili mominos sa 150 ka milyon ka pesos ug misikop sa 30anyos nga si Gilbert Lumanog.

Awhag ni Chan sa DPWH

Nanawagan karon si Mayor Junard “Ahong” Chan sa Dakbayan sa Lapulapu nga dalion sa Department of Public Works and Highways DPWH ang pagtrabaho sa nagkadaiyang drainage ug road construction sa siyudad. Kini tungod sa namugna nga kahuot sa dagan sa trapiko gumikan sa maong mga proyekto.

Tinguha sa mayor nga moabag sa taga DPWH ang mga contractor sa pagdumala sa dagan sa trapiko kay mao kini ang kasabutan ug dili magsalig lang sa mga traffic enforcers.

Ang proyekto sa road construction anaa nahimutang sa mga barangay sa Buaya, Tamiya, ug Sudtungan sa Barangay Basak, Barangay Agus ug Barangay Pajo. Romeo Limpangog/MEL (BANATNEWS)