CEBU, Philippines — Ang direktor sa Department of Education (DepEd)-7 Salustiano Jimenez niawhag sa tanang estudyante nga magpakitabang sa ilang mga ginikanan o magtutudlo kong naglisod sila sa pagtubag sa ilang mga module ug dili maghuna-huna sa pagkutlo sa ilang kaugalingong kinabuhi.
Si Jimenez niluwat sa maong pamahayag human sa report nga adunay mga tinun-an ang nagkutlo sa ilang kinabuhi tungod kay gilisdan sa ilang mga module.
Matud ni Jimenez nga padayon karon ang ilang gihimong imbestigasyon kalabot sa giingong pagpakamatay sa mga tinun-an pagsuta kong kabahin ba sa problema sa learning module ang hinungdan niini.
Atol sa press conference niadtong Martes si Jimenez niawhag sa mga tinun-an nga dili magpanuko sa pagduol sa ilang mga ginikanan o sa ilang mga magtutudlo kong nakasinati sila og kalisod sa ilang mga module base sa new normal nga pagtuon.
Si Jimenez niawhag usab sa mga magtutudlo nga dili i-pressure ang ilang mga tinun-an sa pagsumiter sa mga learning module niini.
Ug mohatag og lugway ngadto sa mga tinun-an sa pagsumiter sa ilang mga module. (BANAT NEWS)