Mga magpapatigayon sa MEPZ nabalaka sa CREATE Bill

CEBU, Philippines — Si Mayor Junard Ahong Chan sa Dakbayan sa Lapu-Lapu nagtinguha  sa pagpadangat og hangyo ngadto sa mga senador alang sa padayon nga paghatag og incentives sa mga patigayon sa diha sa Mactan Export Processing Zone (MEPZ).

Si Chan gikatakdang mopadala og suwat alang sa iyang pagpasabot sa pagkamahinungdanon sa pagpabilin sa Philippine Economic Zone Authority’s (PEZA) power alang sa paghatag og incentives sa mga narehistro nga mga export oriented enterprise.

Sayo pa, ang Mactan Export Processing Zone Chamber of Exporter and Manufactures (MEPZCEM) nisumiter sa ilang position paper ngadto sa Senado diin ilang gipadayag nga  mobiya na  sa ilang pamatigayon dinhi sa nasud kon mapalabang sa mga senador ang balaodnon nga Corporate Recovery and Tax Incentives for Enterprises o CREATE Bill.

Ubos sa CREATE Bill ang PEZA incentives nga naglakip sa income tax holiday, duty-free importation sa raw materials ug capital equipment, domestic sales allowance ug exemption sa  pagbayad sa buhis ngadto sa lokal  nga kagamhanan isip tax break sa investors.

Matud ni Chan nga dako og natabang sa katawhan ang mga patigayon nga anaa sa MEPZ sa Dakbayan  sa Lapu-Lapu diin dili lang mga Oponganon ang nakasulod og trabaho lakip na ang mga taga lain-laing lugar.

Ang mga magpapatigayon sa PEZA gibati karon og kabalaka nga mapalabang ang CREATE Bill tungod kay matangtang ang mga prebilihiyo nga gihatag kanila. (BANAT NEWS)