CEBU, Philippines — Gisusi karon sa Lapu-Lapu City Police Office (LLCPO) ang mga karaang kaso nga gihuptan sa abogadong gibanhigan sa wala mailhing riding in tandem diha sa Barangay Pajac, Lapu-Lapu City niadtong Sabado sa buntag. Matud ni Police Colonel Clarito Baja, LLCPO chief, susihon nila ang mga dagkong kasong gihuptan ni Atty. James Joseph Gupana, 74, taga Barangay Pajac, Lapu-Lapu City, kun may kalabotan ba ang ambush.
Padung si Gupana sa iyang buhatan sa Brgy. Centro sa Mandaue City sa dihang gibanhiganan kini. Bisan samara, nakamaneho pa siya pagpadagan sa iyang sakyanan padung sa Mactan Doctors Hospital.
Naigo si Gupana sa iyang abaga ug sa walang bahin sa lawas ug padayon pa karong giatiman sa tambalanan.
Matud ni Baja nangita pa sila karon mga mga testigo nga makatabang sa ilang imbestigasyon, lakip sa ilang gisusi ang mga CCTV cameras sa palibot diin nahitabo ang krimen.
“Ongoing pa aming investigation kay naa pa sa hospital ang biktima, dili pa sad kaestorya...pag-adto gahapon (Saturday) stable naman hinuon ingon ang doctor,” matud ni Baja.
Tungod sa nahitabo, si Baja miingon nga ilang pangusgan ang ilang control points sa kadalanan tungod kay ikaduha na kini nga high-profile shootings sa siyudad nga binuhatan sa mga wala mailhing riding-in-tandem.
Kahinumdoman nga niadtong Septiyembre 19, gibanhigan patay si Barangay Councilor Zandro Augusto sa wala mailhing mga mamumuno.
“Katong ka councilor(Augusto), we created a special investigation task force. Then, tanang measures, ato gyud i-build up atong (police visibility) like for example atong mobile patrol. Ako ‘tong gitan-aw ang crime areas, atong gi-priority didto. I have already directed to mobilized the barangay tanod to conduct mobile patrol,” matud ni Baja.
Gimandoan sab niya ang mga sakop nga naa sa control points sa mga barangay nga pahugtan ang seguridad ug checkpoint inspection. The Freeman/IBM