CEBU, Philippines — Isip usa sa mga pamaagi nga mapakgang ang pagkuyanap sa coronavirus disease gikan sa mga establisamento gidasig sa Department of Trade and Industry ang mga tag-iya og tindahan nga mogamit og contact tracing mobile application sa pagpasulod og mga kustomer.
Matud pa sa pangulo sa Consumer Protection Division sa DTI-Region 7 nga si Ines Cajegas nga dako gyud og matabang ang application sanglit paspas ang pamaagi niini sa pagpasulod og mga kustomer.
Sa kasamtangang pamaagi kinahanglang mo-fill up og form ang kustomer sa dili pa sila pasudlon apan mao sab kini rason nga taas ang linya sa mga tawo diha sa gawas maong dunay uban magkasikit na hinuon ug mawala ang physical distancing.
Apan kun mogamit ang establisamento og contract tracing mobile application di na magpul- puli sa pagamit og ballpen ug taas nga linya sa gawas.
Kausa ra magparehistro, ang QR code i-scan lang ug otomatiko na kining ma-record matag balik sa kustomer. Gigamit na kini sa ubang mga tindahan ug kan-anan sanglit libre man kini nga app.
Sa pikas bahin, upat ka mga barangay sa Lungsod sa Consolacion ang perfect attendance sa RT-PCR swab testing nga gipasiugdahan sa lungsod alang sa mga kawani sa munisipyo, barangay workers, magtutudlo ug mga naninda sa merkado.
Ang upat ka barangay nga perpekto ang attendance naglakip sa Cansaga, Garing, Jugan ug Pulpogan. Romeo T. Limpangog/IBM (BANATNEWS)